Hugleiðslur í náttúrunni

Náttúran og þú – Útihugleiðsluferðalag í fimm hlutum

Náttúran er ekki bara staður sem við heimsækjum, náttúran er heima. Þar sem við vöknum til lífsins, skynjum dýpra og finnum okkur sjálf á ný.
Náttúran og þú er fimm skipta útihugleiðslunámskeið þar sem við komum saman undir berum himni og njótum þess að vera, skynja og upplifa tengingu við okkur sjálf og náttúruna. Með því að staldra við og tengjast náttúrunni meðvitað – í gegnum hreyfingu, skynjun, öndun og kyrrð – opnum við fyrir nýja upplifun á okkur sjálfum og umhverfinu.

Rannsóknir sýna að hugleiðsla úti í náttúrunni getur dregið úr streitu, aukið sköpunarkraft og stuðlað að vellíðan. Að vera meðvituð úti við, í samhljómi við umhverfið, veður, hljóð og ilm, getur dýpkað tengsl okkar við móður jörð og dregið okkur inn í núið á einstakan hátt.

Við hittumst á ákveðnum stað í hverri viku og göngum saman í núvitund að hugleiðslustaðnum okkar, sem er breytilegur milli vikna. Yfir vikurnar fimm tengjumst við frumefnunum fjórum – jörð, eldi, vatni og lofti – og könnum hvernig þau birtast í umhverfi okkar og í okkur sjálfum.

Í hverjum tíma gerum við léttar öndunaræfingar, núvitundaræfingar og hugleiðslu. Við njótum einnig helgs kakós frá Suður-Ameríku sem styður við hjartatengingu, mýkt og dýpri tengingu við líkamann, jörðina og hvert annað..

Saman sköpum við rými fyrir kyrrð, tengingu og nærveru.
Saman komum við heim í okkur sjálf.

Hagnýtar upplýsingar:
Verð fyrir námskeið er 15.000 kr.
Þriðjudaga kl. 20:00 – 21:00
Upphafsstaðsetning (meeting point) er auglýst kl. 18 samdægurs fyrir hvern þriðjudag fyrir sig
2. júní
9. júní
16. júní
23. júní
30. júlí

Mikilvægt er að klæða sig eftir veðri, en við mætum náttúrunni þar sem hún er hverju sinni.

Við erum náttúruvæn og notum fjölnota bolla/mál; komdu með þitt eigið mál.